www
2011/2/17 15:22 
近日，因為政府堅持「鼓勵就業交通津貼計劃」只有家庭可作為申請單位等嘅原因，立法會多個黨派聯手要求押後表決撥款，搞到勞福局長張建宗一頭煙。呢單新聞，按道理基層市民同勞工團體最關心，點知噚日明光社突然出聲明，話關注呢件事，理由係「政府計劃將同居男女當一戶申請非常不恰當」。
伺機宣揚反同性戀

明光社總幹事蔡志森列舉三大原因，除咗話呢個做法同現行福利政策不一致、審核同居關係行政費高昂之外，仲有一樣係「此做法必然引起同性同居者是否也適用的爭議」，擔心若政府拒絕同性同居者嘅申請，就會被批評歧視同性戀者；若接受申請，豈不是同唔承認同性婚姻及任何同性同居關係嘅立場矛盾咁話？
睇到呢度，八方終於明晒。真係不得不佩服「道德塔利班」見縫插針嘅能力，同當年撲出來反對家暴條例保障埋同性同居者同出一轍。香港女同盟會幹事煒煒直斥明光社係本末倒置：「咁都可以出來抽水？」
煒煒話，交津呢個議題嘅討論核心係點樣先鼓勵到基層就業，明光社卻趁住單新聞鬧哄哄之際，出來宣揚佢哋反對同性戀嘅言論，「見到同居關係即係諗起同性戀，恐同恐到咁」，真係非常無稽，荒謬至極。
不過，蔡志森好認真咁同八方講，佢會動員其他團體去信政府，表達關注，又會約見議員了解佢哋嘅態度，至於會唔會好似上次家暴條例咁，出來示威抗議，就要視乎事態發展。
張建宗應更加頭痕

勞福局發言人噚晚回應話，鼓勵就業交通津貼計劃下應用「住戶」嘅概念，係為咗進行經濟審查，因此「住戶」嘅定義亦係建基於經濟上嘅考慮，具體係指居於同一處所而經濟上有緊密連繫嘅人士組成嘅單位，其成員可以係核心家庭成員，亦可以係由其他經濟上有緊密連繫嘅人士組成。
交津單嘢最後點收科仲未知，家連明光社都要叉隻腳落去，張建宗應該會更加頭痕。

(李八方)

http://www1.hk.apple.nextmedia.c ... amp;art_id=14983211